ഏത്തക്കുല

  ഏത്തക്കുല

ആ കർഷകന് വീണ്ടും 

കിട്ടി ഏത്ത വാഴക്കുല 

കർമഭൂമിയിലുള്ളൊരു 

തുണ്ട് മണ്ണിൽ പട്ടിണിയിലും 

നട്ടുനനച്ചു വളർത്തി 

തീർത്തു മരതക പച്ചത്തോട്ടം 

ആ ഏത്തവാഴക്കുലതോട്ടം

കൊമ്പനാനയും പന്നിയും 

കേറിയില്ല  കുത്തിമലർത്തിയില്ല  

വവ്വാലുകൾ ചപ്പിയില്ലാ ,നോക്കുവിൻ 

സ്വർണ്ണക്കനി കിനിയും വാഴക്കുലതോട്ടം

സ്വർണ്ണം നിറയുമാ മണ്ണും.

അവകാശികൾ ഇനി ഏറും 

വമ്പരാം  കമ്പനി ജന്മിമാർ 

വന്നു ചൊല്ലി  കുലയുടെ 

ചന്തം  ,സുഗന്ധമുള്ള തേനൂറും

കൂമ്പും ചങ്കും കവർന്നു ,

നൽകും ജപ്തി നോട്ടീസ്സും..

അപ്പോഴും കന്നിന്റെ 

ചാണകം വാഴക്കന്നിന് 

വിതറി കടക്കൊള്ളിയായി 

ചെളിയിൽ വിയർത്തു നിന്നു  

വേലയില്ലാത്തനാട്ടിൽ തീർപ്പൂ  

ആ ഏത്തവാഴക്കുലതോട്ടം.

മണ്ണും കൂരയും കനിയും പോയി 

ആ കർഷകൻ ചാക്കുകെട്ടിൽ 

വാരിനിറച്ചു കുറച്ചു വാഴക്കന്നും  

മണ്ണും ,പലായനം തുടരുമ്പോൾ 

കടിച്ചുകീറുവാനായി വഴിയിൽ

രാഷ്ട്രീയ നരികൾ ഏറ്റുമുട്ടും  

അതിലകപ്പെട്ടു  പൊട്ടിയൊഴുകും 

വീണ്ടും ആ കർഷകൻറെ രക്തം. .